Bugun Urganchda umumiy   maydoni 140  gektar bo‘lgan al-Xorazmiy majmuasi qurilishiga tamal toshi qo‘yildi. Shu munosabat bilan o‘tkazilgan tadbirda O‘zbekiston Respublikasi Bosh vazirining birinchi o‘rinbosari Achilboy Ramatov, Bosh vazir o‘rinbosari Aziz Abduhakimov, qurilish vaziri Botir Zakirov, Xorazm viloyati hokimi Farxod Ermanov va  jamoatchilik vakillari  ishtirok etdilar.

Loyiha bo‘yicha majmuada buyuk alloma, algoritm asoschisi  al –Xorazmiyning balandligi  30,5 metrlik muhtasham haykali qad rostlaydi. Yangi massivda al-Xorazmiy nomidagi universitet va talabalar yotoqxonalari, 3000 o‘rinli maktab va 1500 o‘rinli maktabgacha ta’lim muassasasi, IT-park, innovatsiya markazi, sport majmuasi, ilmiy-tadqiqot markazi, ko‘p qavatli  uylar va avtoturargohlar, markaziy alleya – “Yangi O‘zbekiston” bog‘i barpo etiladi. Shuningdek, xorijiy investitsiyalarni jalb qilgan holda texnopark va zamonaviy to‘qimachilik   korxonalari qurilib, ishga tushiriladi.