Bugun, 10-dekabr kuni O‘zbekiston davlat xoreografiya akademiyasi Urganch filialida “Kelajak soati” doirasidagi navbatdagi “Ma’rifat darslari” bo‘lib o‘tdi. Ushbu ma’rifiy dars O‘zbekiston Respublikasi Davlat madhiyasining 33 yilligiga bag‘ishlanib, “Millat qo‘shig‘i” mavzusida tashkil etildi.
Tadbirda Davlat madhiyasining yaratilish tarixi, undagi g‘oyaviy-ma’naviy mazmun, madhiyaning xalqimiz qalbidagi o‘rni va uning mustaqillik timsoli sifatidagi ahamiyati haqida so‘z yuritildi.
Mazkur darsni filial direktorining birinchi o‘rinbosari A.Saparbayev olib bordi. U o‘z ma’ruzasida yosh avlodni vatanparvarlik ruhida tarbiyalash, milliy qadriyatlarni e’zozlash hamda davlat ramzlariga hurmat bilan munosabatda bo‘lish muhimligini alohida ta’kidladi.
Tadbir so‘ngida ishtirokchilar madhiyamizning xalqimiz birligi, g‘ururi va iftixori ramzi sifatidagi o‘rni haqida o‘z fikr-mulohazalarini bildirdilar.
