Bugun Mahmud az-Zamaxshariy kutubxonasida Komil Nurjonov, Shuhrat Saparov va Sharqiya Eshjonovalarning muallifligida chop etilgan “Avesto va Jahongashta Lazgi” nomli kitob taqdimoti bo‘lib o‘tdi.
Tadbirda O‘zbekiston davlat xoreografiya akademiyasi Urganch filiali xodimlari va talabalari faol ishtirok etishdi. Ular kitobning mazmun-mohiyati, undagi ilmiy-nazariy qarashlar, “Avesto” kitobi bilan milliy raqs san’atimiz — Lazgi o‘rtasidagi tarixiy va falsafiy bog‘liqlik haqidagi ma’lumotlar bilan yaqindan tanishdilar.
Taqdimot talabalarda katta taassurot qoldirdi. Ayniqsa, Lazgining jahon miqyosida qadrlanishi va uning o‘zbek xalqining qadimiy madaniy merosi sifatida taqdim etilishi yoshlar qalbida milliy g‘ururni yanada mustahkamladi.
Mazkur uchrashuv nafaqat kitob taqdimoti, balki ilmiy-ma’rifiy hamkorlik, yoshlarni milliy merosimizni chuqurroq o‘rganishga undovchi muhim madaniy tadbir sifatida ham ahamiyat kasb etdi.
