2026-yil 20-may kuni O‘zbekiston davlat xoreografiya akademiyasi Urganch filiali tashabbusi bilan “Narkojinoyatga qarshi kurash — har birimizning burchimiz!” mavzusida davra suhbati tashkil etildi. Tadbir yoshlar o‘rtasida giyohvandlik vositalarining zararli oqibatlarini keng tushuntirish, sog‘lom turmush tarzini targ‘ib qilish hamda jamiyatda huquqbuzarliklarning oldini olishga qaratilganligi bilan ahamiyatli bo‘ldi.
Mazkur uchrashuvda filial direktori M.B.Kuchkarov ishtirok etib, professor-o‘qituvchilar hamda ishchi-xodimlar bilan ochiq muloqot o‘tkazdi. Suhbat davomida u giyohvandlikka qarshi kurashda ta’lim muassasalarining o‘rni beqiyos ekanini ta’kidlab, har bir pedagog va xodim yoshlar tarbiyasida mas’uliyat bilan yondashishi lozimligini alohida qayd etdi.
Tadbirda filial jamoasi tomonidan talaba-yoshlar o‘rtasida profilaktik ishlarni kuchaytirish, sog‘lom hayot tarzini targ‘ib etish, bo‘sh vaqtni mazmunli tashkil etish bo‘yicha taklif va mulohazalar bildirildi. Shuningdek, narkojinoyatlarning jamiyat barqarorligiga salbiy ta’siri, uning oldini olishda hamkorlikdagi ishlar muhimligi yuzasidan atroflicha fikr almashildi.
Umuman olganda, mazkur davra suhbati jamiyatda sog‘lom ma’naviy muhitni shakllantirish hamda narkojinoyatlarga qarshi kurashda hamjihatlikni mustahkamlashga xizmat qildi.
