Bugun, 2026-yil 14-may kuni Oʻzbekiston davlat xoreografiya akademiyasi Urganch filialida magistratura va doktoranturaga tayyorgarlik koʻrayotgan, ushbu yoʻnalishlarda tahsil olayotgan hamda ilmiy faoliyat bilan shugʻullanayotgan yosh xodimlar va talabalar bilan uchrashuv boʻlib oʻtdi.
Yoshlar kuni doirasida tashkil etilgan mazkur uchrashuvda filial direktori M.Kuchkarov ilm yoʻlida izlanayotgan, bilim olish va ilm-fan bilan shugʻullanishga intilayotgan yoshlarni har tomonlama qoʻllab-quvvatlash filial rahbariyatining doimiy eʼtiborida ekanligini taʼkidladi. Shuningdek, u yoshlarni ilmiy izlanishlar olib borish, yangi gʻoyalar ustida ishlash va oʻz salohiyatini namoyon etishga daʼvat etdi.
Tadbir davomida iqtidorli talabalar bilan ishlash boʻyicha muhandis A.Saparbayeva startap loyihalar yuzasidan tushuntirishlar berib, yoshlarning innovatsion gʻoyalari va tashabbuslarini rivojlantirish bo‘yicha tavsiyalar bildirib oʻtdi.
Uchrashuv samimiy ruhda oʻtib, yoshlar oʻzlarini qiziqtirgan savollarga javob oldilar hamda kelgusidagi ilmiy faoliyatlari uchun zarur tavsiya va motivatsiyaga ega boʻldilar.
