Kuni kecha 2026-yil 17-aprel kuni O‘zbekiston davlat xoreografiya akademiyasi Urganch filiali talabalari ishtirokida mazmunli va ilhomlantiruvchi ijodiy uchrashuv bo‘lib o‘tdi. Filialning xotin-qizlar maslahat kengashi raisi B.Sapayeva hamda dekan maslahatchisi M.Narbayeva tashabbusi bilan tashkil etilgan ushbu tadbirda talaba-qizlar faol ishtirok etdilar.
“Muvaffaqiyat sari yo‘l” mavzusida o‘tkazilgan uchrashuv mehmoni — Urganch ixtisoslashtirilgan boshlang‘ich raqs san’ati maktab-internati direktori, “Xalq ta’limi a’lochisi” ko‘krak nishoni sohibasi Samandarova Gulnora Erkinovna bo‘ldi. U o‘zining ko‘p yillik mehnat faoliyati, rahbarlik tajribasi, kasbiy yutuqlari hamda san’at yo‘lidagi izlanishlari haqida batafsil so‘zlab berdi.
Suhbat davomida G.Samandarova muvaffaqiyatga erishishda qat’iyat, mehnatsevarlik va o‘z ustida ishlashning ahamiyatiga alohida to‘xtalib o‘tdi. Shuningdek, u yosh avlodni, ayniqsa talaba-qizlarni katta maqsadlar sari intilishga, o‘z salohiyatini to‘liq namoyon etishga undadi. Uchrashuv ochiq muloqot ruhida o‘tdi.