Assalomu alaykum!
Hurmatli ota-onalar va abituriyentlar!

Ayni damda Oʻzbekiston davlat xoreografiya akademiyasi Urganch filialida 2026/2027-oʻquv yili uchun kasbiy (ijodiy) imtihonlar boshlanish arafasida.

Ma’lumki, filialimiz mamlakatimizda xoreografiya san’ati, milliy va zamonaviy raqs ijrochiligi, balet san’ati hamda xoreografiya pedagogikasi yoʻnalishlari boʻyicha malakali mutaxassislar tayyorlaydigan nufuzli oliy ta’lim muassasalaridan biridir.
Bu maskanda oʻzining yuksak ijodiy va pedagogik faoliyati bilan xoreografiya san’ati rivojiga munosib hissa qoʻshib kelayotgan tajribali ustozlar hamda iste’dodli professor-oʻqituvchilar yosh avlodga san’at sirlarini oʻrgatib kelmoqdalar.

➡️ Ishonchingiz komil boʻlsinki, qabul va kasbiy (ijodiy) imtihon jarayonlari ADOLATLI va SHAFFOF tarzda tashkil etilishi uchun filialimizda barcha zaruriy choralar koʻrilgan.
Jumladan, barcha imtihon jarayonlari videokuzatuv kameralari orqali yozib olinadi hamda belgilangan tartibda ochiqlik va shaffoflik ta’minlanadi.

➡️ Abituriyentlarning ijodiy chiqishlari va amaliy ishlari xolis baholanishi uchun imtihon komissiyalari tarkibiga xoreografiya san’ati sohasining tajribali mutaxassislari, taniqli raqs ustalari, san’at arboblari hamda malakali professor-oʻqituvchilar jalb etiladi.
Imtihon natijalari belgilangan tartibda va oʻz vaqtida filialning rasmiy axborot manbalari orqali e’lon qilinadi.

➡️ Eng asosiysi, qabul jarayonlarida korrupsiya, tanish-bilishchilik va boshqa noqonuniy holatlarga mutlaqo yoʻl qoʻymaslik maqsadida barcha zaruriy tashkiliy va huquqiy choralar koʻrilgan.

➡️ Hurmatli qabul va imtihon komissiyasi a’zolari!
Sizlarning zimmangizga nihoyatda mas’uliyatli vazifa yuklatilgan.
Har bir abituriyentning iste’dodi, tayyorgarligi va bilimini xolis, adolatli hamda amaldagi qonunchilik talablari asosida baholashingiz, manfaatlar toʻqnashuvi yoki har qanday noqonuniy ta’sirlarga mutlaqo yoʻl qoʻymasligingiz muhimdir. Zero, bugungi xolis baho ertangi xoreografiya san’ati ravnaqiga munosib hissa qoʻshadigan iste’dodli yoshlarni saralashga xizmat qiladi. Bu nafaqat kasbiy, balki yuksak vijdoniy mas’uliyat hamdir.
Bugun talabalikka tavsiya etiladigan yoshlar ertangi san’atimiz taraqqiyotini belgilovchi ijodkorlar ekanini anglagan holda, filialimiz jamoasi ushbu jarayonga alohida mas’uliyat bilan yondashmoqda.
Oʻz navbatida, siz aziz abituriyentlar ham begona shaxslarga emas, avvalo oʻz iqtidoringiz, mehnatingiz va bilimingizga ishoning.

➡️ Hurmatli ota-onalar!
Bugungi oqilona qaroringiz va toʻgʻri tanlovingiz farzandingizning porloq kelajagini bunyod etishda muhim oʻrin tutadi.
Farzandingizni halollik, poklik va vatanparvarlik ruhida tarbiyalab, uning katta hayot sari qoʻyayotgan ilk qadamlariga korrupsiya, firibgarlik va noqonuniy yoʻllarning aralashishiga aslo yoʻl qoʻymang.

Davlatimiz rahbari ta’kidlaganlaridek:
"Korrupsiya – davlat taraqqiyotiga toʻsiq boʻladigan, adolat va qonun ustuvorligini izdan chiqaradigan, jamiyatda ishonch muhitini zaiflashtiradigan eng jiddiy tahdid. Korrupsiyaga yoʻl qoʻyish esa islohotlarimizga xiyonatdir!"

Yana bir bor barchangizga mustahkam sogʻliq, xotirjamlik hamda kirish imtihonlarida ulkan muvaffaqiyat va omad tilayman.